黃絲 與 發條橙

       講起分黃藍，要推一個叫白兵stormtrooper嘅YouTube channel。雖然有D野都唔係好認同佢哋，或者唔明佢哋某D睇法嘅解釋，但係覺得次次睇佢哋都覺得學咗多D野，知道咗多D事，而且我覺得佢哋好好嘅係會讚D做得好嘅事或者推其他youtuber。最重要係次次睇佢哋都覺得香港仲係有希望嘅！我地要加油！

      但係呢篇唔係為咗推佢哋lol，佢地話黃藍係俾政治BB班嘅人，政治立場係一個光譜，唔係只有黃同藍。佢話佢哋唔係黃絲，佢哋係傾向本土嘅（佢哋好似覺得黃絲=泛民）。咁我聽佢哋講落，我都覺得我同佢哋立場都相似，所以我都應該係傾向本土嘅。但係我又覺得既然藍黃只係最簡單最粗略嘅分法，就好似貓、獅子、狗都係唔同，但係獅子同貓都係貓科啫，點都唔會獅子同狗/貓同狗擺埋同一類嘛～所以我依然固執地認為佢哋同我都係黃，哈哈

      話說第一次知道《發條橙》（a clockwork orange)呢套電影係因為佢嘅標籤係禁片、經典、人性等等。我承認我一直都係有D惡趣味又獵奇心態，每次有D標籤，我就好奇有幾巴閉，有幾反映人性，有幾黑暗。幾年前要睇電影做功課，呢部電影係其中一套可做功課嘅戲，先睇咗套戲，睇完只係覺得套戲有D奇怪同荒誕，對我來講又唔係真係好大衝擊。

      但係唔知點解，尋日我訓醒，第一個念頭係：其實個D接受唔到勇武嘅同路人，甚至係到依家都只係做到和理非嘅人，包括我自己，係唔係都已經係一個發條橙呢？就好似改造後的Alex，即使被刻意地侮辱、毆打、欺凌，佢都依然冇辦法還手來保護自己。佢嘅自保能力同佢失控嘅暴力，被綑綁起來，一刀切得乾乾淨淨。

       但係咁就代表Alex係一個好人咩？佢嘅和善唔係佢真心相信擁護嘅，佢只係一個不可以作惡的機器人。電影入面有個神父話善良係人嘅選擇。善之所以為人所稱頌，就係因為人係選擇個一刻，佢可以選擇視而不見，佢可以選擇袖手旁觀，佢甚至可以成為惡的一方，但係佢選擇咗善，即使會與惡為敵。

      睇個時以為係電影，係故事情節，但係點知呢件事係以一種冇人發覺嘅方式發生咗，真係初睇不明戲中意，睇明已是戲中人。

       我地都係Alex，都係改造過嘅Alex。呢個社會，打著和平主義、大愛嘅旗幟，列出一條條嘅「和平規條」，暴力唔啱，總之暴力就係唔啱，就算俾人刮咗一巴都要轉埋另一面俾佢刮，電視有暴力唔睇得，遊戲有暴力唔玩得，法律會懲罰暴力嘅人。受教化嘅人，就係會咁樣相信，咁樣生活，徹底失去暴力嘅能力。所以就好似Alex係發佈會咁，俾人蓄意、當眾侮辱同毆打，都反抗唔到。
 
      現實就好似721、831咁，其實人好多，但係會還手嘅人好似真係冇咩。我唔係想指責個日現場嘅任何人，因為我冇資格，我自問如果自己係現場，我好清楚我一定都係還唔到手嘅人。但係就係呢個認知，我好嬲，嬲我自己。我呢D唔係「和平主義」啊，唔係「大愛左膠」啊，唔係咩「和善善良」啊，我只係一個被呢個社會教化到，為咗社會安定而失去生存能力，「只能夠做好人」嘅發條橙咋！因為我知道，呢幾個月，我FF過好多次，都祈禱過好多次，如果可以，我想狠狠地折磨某D人，將所有手足受過嘅全部還返曬俾佢哋。咁樣嘅我，有咩可能係「大愛左膠」，咁點解我就係做唔到其他手足做到嘅野？我只不過係俾社會規條、法律後果綁住嘅發條橙。

      我當然反對失控同埋以發洩為目的嘅暴力，亦都唔應該主動攻擊人。對我來講，我甚至覺得如果俾人攻擊/學校俾人欺凌，應該先報警，先話俾老師知。我嘅諗法係，我地建立一個文明社會和制度，就係脫離邊個夠殘暴邊個就生存嘅機制，所以制度原本就有保障人嘅個人權利同生命財產安全，唔洗受害人以自身嘅拳頭去懲罰加害者。但係當呢嘅制度失去佢嘅作用，咁就唔洗同佢客氣，亦都冇得同佢客氣，要狠狠地還擊，因為呢個時候冇其他人、其他野可以保護到自己。

      而作為呢個機制嘅守護者、執行者、締造者（即係呢個社會嘅大人、議員、有權有勢嘅人，學校嘅老師、校長等），你地冇做到你地嘅責任，去保護、維持、改善呢個制度嘅功能，冇辦法保護受害人，甚至冇辦法擋係受害人面前，你地有咩資格話勇武暴力？有咩資格係到指指點點、說三道四？

      生活係和平、文明嘅城市，我們以為所有人都被這樣教化，所以我們都很安全，直到今日先知道，原來被教化的只有我們，有些人並沒有。

      Alex最後從樓上跳落去，冇死到，但係佢掙脫咗發條鏈子，佢會變返一個壞人。但係佢終於有機會去選擇做一個好人，而當有一日佢選擇做一個好人，咁佢嘅善良將會被傳頌，因為做一個好人，係佢嘅選擇。無論佢係好人定壞人，佢跳落去個一刻，唔係死，就係重生，佢冇死到，重要嘅係，佢以後可以保護自己了。